Brianna var stungin 28 sinnum af Scarlett Jenkinson og Eddie Ratcliffe sem á dögunum voru dæmd í lífstíðarfangelsi.
Málið hlaut mikla umfjöllun í Bretlandi en við meðferð málsins fyrir dómstólum kom í ljós að Scarlett og Eddie voru tíðir gestir á vefsíðum myrkranetsins þar sem morð og pyntingar voru meðal efnis sem þau skoðuðu.
Sagði sálfræðingur að ungmennin tvö, á mótunaraldri, hefði orðið fyrir óhjákvæmilegum skaða sem kveikti myrkar kenndir þeirra. Þá spilaði það inn í að Brianna var trans barn og hafði Eddie ítrekað kallað Briönnu „það“ og „stelpustrák“.
Esther ræddi málið við BBC um helgina og segir hún að gera þurfi róttækar breytingar á aðgengi ungmenna að samfélagsmiðlum. Vill hún að sett verði í lög að ekki megi selja börnum undir 16 ára síma sem innihalda samfélagsmiðlaforrit. Þá vill hún að vafasöm leitarorð barna verði „flögguð“ þannig að foreldrar þeirra geti fylgst betur með.
Í þættinum Sunday With Laura Kuenssberg á BBC sagði Esther meðal annars:
„Við viljum að því verði komið í lög að ákveðnir símar verði aðeins aðgengilegir börnum undir 16 ára. Þannig að ef þú ert 16 ára eða eldri getur þú fengið fullorðinssíma en ef þú ert undir 16 ára færðu annars konar síma sem inniheldur ekki alla þessa samfélagsmiðla,“ segir hún.
Þá vill hún að samhliða þessu fái foreldrar sjálfkrafa aðgang að smáforriti þar sem þeir geta fylgst með því sem börn þeirra gera á netinu. „Þannig að ef börn eru að leita að sömu orðum og til dæmis Scarlett og Eddie voru að gera þá fái foreldrar meldingu um það,“ segir hún.
Telur Esther að með þessu hefðu foreldrar Scarlett og Eddie – sem voru grunlausir – getað fengið viðeigandi aðstoð fyrir börn sína.
Þá hafi komið í ljós að Brianna sjálf leitaði að efni varðandi sjálfsskaða sem Esther hefði ekki vitneskju um. „Ef hún hefði ekki getað nálgast þessar síður held ég að henni hefði ekki liðið eins illa og raun ber vitni.“
