Michele de Nostredame, betur þekktur sem Nostradamus, var apótekari sem var uppi á sextándu öld. En auk þess að stunda lyfsölu dundaði hann sér við skriftir og skrifaði meðal annars Les Propheties, sem er safn 942 ferskeytla, sem margir telja vera spádóma um framtíðina.
En getur verið að í þessu mikla safni ferskeytla leynist spádómur um þriðju heimsstyrjöldina? Það telja sumir. Samsæriskenningasmiðir hafa grandskoðað skrif hans áratugum saman og margir telja hann ótvírætt hafa spáð rétt fyrir um marga atburði. Hann er meðal annars sagður hafa spáð fyrir um brunann mikla í Lundúnum 1666 og valdatöku Adolfs Hitler í Þýskalandi.
Margir þeirra sem hafa trú á spádómum Nostradamusar telja að hann hafi spáð fyrir um þriðju heimsstyrjöldina og að hún muni standa yfir í 27 ár. Þessi spá er sögð vera falin í einni ferskeytlu hans. Miðað við túlkanir á ferskeytlunni mun stríð brjótast út í hjarta Evrópu, Frakklandi, á milli tveggja stórvelda.
„Stóra stríðið mun hefjast í Frakklandi og ráðist verður á alla Evrópu. Þetta verður langt og hryllilegt stríð en að lokum verður friður en aðeins fáir munu njóta hans. Stríð á milli tveggja stórvelda mun hefjast og það mun standa í 27 ár.“
Í annarri ferskeytlu er Nostradamus sagður spá fyrir um stríð í Asíu á milli Norður-Kóreu og Bandaríkjanna.
En er einhver ástæða til að taka þetta alvarlega? Eigum við að trúa því að maður sem var uppi á sextándu öld hafi getað spáð rétt fyrir um atburði í framtíðinni? Það verður víst hver og einn að gera upp við sig.
Þeir sem telja sig geta túlkað ferskeytlur Nostradamusar og tengt við samtímann hverju sinni eru sannfærðir um að margir spádóma hans hafi ræst. Hann er sagður hafa spáð fyrir um frönsku stjórnarbyltinguna, kjarnorkuárásirnar á Japan, morðið á Olof Palme, uppgang nasisma í Þýskalandi og er sagður hafa nefnt Hitler með nafni. Hann er einnig sagður hafa spáð fyrir um hrun Sovétríkjanna, báðar heimsstyrjaldirnar, árásirnar á Tvíburaturnana í New York 2001, stríðið í Írak og fangabúðir Bandaríkjamanna í Guantanamo á Kúbu.
Nostradamus er sagður hafa spáð fyrir um kreppuna sem skall svo harkalega á okkur 2008 og hafa verið skýrmæltur um hættu sem Vesturlandabúum muni stafa af ofsatrúarmönnum frá Arabaríkjum.
Margir sérfræðingar stigu fram eftir að kreppan skall á 2008 og sögðust hafa séð hana fyrir en miðað við það sem aðdáendur Nostradamusar segja þá spáði hann fyrir um hana um miðbik sextándu aldar.
Endalok neyslusamfélagsins, Nauðungaruppboð og vaxandi vantrú á getu stjórnmálamanna, Hrun verðbréfamarkaðarins, Verðbólga og gerræði, eru fyrirsagnir í bók Guðmundar Sigurfreys Jónassonar um spádóma Nostradamusar sem kom út 1987, löngu áður en kreppan skall á svo hér er ekki um eftirátúlkun spádómanna að ræða. Allar þessar fyrirsagnir eiga við um það sem gerðist í tengslum við kreppuna nema hvað vandséð er að neyslusamfélagið hafi liðið undir lok, kannski stendur það bara styrkari fótum en nokkru sinni áður?
Þá spáði hann fyrir um að alheimsleiðtogi kæmi frá Íslandi á þessari öld. Sú spá hefur ekki enn ræst en það er nú ansi mikið eftir af öldinni þannig að ekki er öll von úti um að þessi spá rætist og kyndi þar með undir þjóðarstolti okkar Íslendinga. Þessi nýi leiðtogi er sagður verða boðberi nýrrar og gjörbreyttrar heimsmyndar og nefnir Nostradamus hann Herakles Selin.
„Þar sem þrjú höf (Atlantshaf, Grænlandshaf og Íslandshaf) liggja að landi fæðist sá sem gerir fimmtudag (Þórsdag) að hátíðisdegi. Frægð hans, völd og vegsauki mun vaxa þegar Asía riðlast vegna styrjaldar á sjó og landi.“
Hann spáði einnig fyrir um innrás Kínverja í Evrópu en sú spá hefur nú ekki enn ræst. Meðal fyrirsagna í kafla bókarinnar Spádómar Nostradamusar um herskáa Kínverja má nefna: Innrás Kínverja í Evrópu, Þriðja heimsstyrjöldin, Bandalag Kínverja og múslima, Herför að Rín og Dóná.
Þetta hefur ekki enn ræst eins og fyrr segir en hver veit hvað framtíðin ber í skauti sér?
En Nostradamus hefur að sögn einnig spáð fyrir um innrás múslima í Evrópu í kjölfar árásar á múslimaríki og þess að mikilfenglegur leiðtogi múslima komi fram á sjónarsviðið. Nostradamus er sagður hafa spáð fyrir um að Írak, Íran, Alsír, Túnis og Líbía ráðist á Evrópu en Tyrkir og Egyptar standi fyrir utan þetta bandalag og verði sjálfir fyrir barðinu á því. Það verða að sögn Tyrkland, Grikkland, Ítalía, Frakkland og Spánn sem verða fyrir barðinu á innrásarhernum.
Nostradamus er einnig sagður gefa í skyn að tvö voldugustu ríki Asíu og Afríku muni fara með hernaði alla leið að Rín og Dóná.
En meðal fyrirsagna á spádómum Nostradamusar um stríðsátök má nefna:
Styrjöld við Ísrael breiðist út til Vestur-Evrópu, Þjóðverjar og Spánverjar í styrjöld við múslima, Kafbátaárásir á Bretlandseyjar, Múslimar herja á Evrópu, Írak gerir skyndiárás á NATO-ríki.
Nostradamus er sagður hafa spáð fyrir um að hans eigin spádómar hljóti viðurkenningu árið 2066 og því ættum við að geta varpað öndinni léttar þangað til þar sem heimsendir verður varla fyrir þann tíma.
En rétt er að hafa í huga að allt eru þetta síðari tíma túlkanir manna á skrifum Nostradamusar en ferskeytlur hans þykja oft og tíðum torræðar og erfiðar í túlkun.
