Þegar þorsti sækir að hvaða drykki skyldi þá vera best að drekka til að viðhalda góðu vökvajafnvægi í líkamanum. Heilsuvefur CNN er með svarið.
Það er vissulega hægt að fá sér vatnsglas en gamla góða vatnið er ekki sá drykkur sem er bestur fyrir vökvajafnvægið. Þetta hefur rannsókn á vegum St. Andrews háskóla í Skotlandi leitt í ljós. Í rannsókninni voru áhrif ýmissa drykkja á vöxvajafnvægi líkamans könnuð.
Niðurstöðurnar voru þær að vatn, hvort sem það er kolsýrt eða ekki, er nokkuð gott til að koma aftur á vökvajafnvægi í líkama sem tapað hefur vökva. Drykkir sem innihalda smáræði af sykri, fitu eða próteini viðhalda hins vegar vökvajafnvægi í líkamanum lengur en vatn gerir.
Orsakirnar eru viðbrögð líkamans við drykkjum. Hluti af því er magn vökva í viðkomandi drykk. Því meira sem þú drekkur því hraðar fer vökvinn úr maga þínum og í blóðrásina þar sem hann getur bætt vökvajafnvægið. En með meiri hraða á þessu ferli viðhelst vökvajafnvægið skemur.
Annar þáttur sem hefur áhrif á hversu vel drykkur bætir vökvajafnvægi líkamans er næringarinnihald. Til dæmis leiddi rannsóknin í ljós að mjólk hefur enn betri áhrif á vökvajafnvægið en vatn. Það er sagt vera vegna laktósans, sem er einnig kallaður mjólkursykur, próteinsins og fitunnar í mjólkinni. Þetta allt hjálpar við að hægja á því að vökvinn fari úr maganum sem hefur þau áhrif að viðhalda vökvajafnvægi í lengri tíma.
Mjólk inniheldur einnig sódíum sem virkar eins og svampur og heldur vökva lengur í líkamanum.
Ekki kemur fram í umfjöllun CNN hvort að kannað hafi verið hvort mjólk án laktósa sé verri fyrir viðhald vökvajafnvægis líkamans.
Drykkir með meiri sykri, bæði viðbættum og frá náttúrunnar hendi, eins og t.d. ávaxtasafar og gos eru ekki eins góðir fyrir vökvajafnvægið og drykkir með minna sykurinnihaldi. Sykraðri drykkirnir eru reyndar lengur í maganum en þegar vökvi með hátt sykurinnihald fer úr maganum endar hann í smágirninu, til að leysa betur upp sykurinn, og það hefur ekki eins góð áhrif á vökvajafnvægi líkamans.
Ef fólki vantar vökva í líkamann er mælt með því að velja alltaf vatn frekar en gos. Vatnið er líka nauðsynlegt fyrir nýrun og lifrina en það hjálpar þessum líffærum að hreinsa eiturefni úr líkamanum.
Að halda góðu vökvajafnvægi í líkamanum heldur liðamótum vel smurðum, hjálpar við að forðast sýkingar og að flytja næringarefni til fruma líkamans.
Hversu góðu vökvajafnvægi tiltekinn drykkur kemur á skiptir þó ekki höfuðmáli fyrir fólk nema þá helst í aðstæðum þar sem um mikið vökvatap er að ræða eins og t.d. við íþróttaiðkun.
