Corinna Schumacher, eiginkona Michael Schumacher hefur verið föst í fangelsi undanfarin áratug eða síðan að kappaksturskappinn lenti í alvarlegu skíðaslysi og örkumlaðist. Þetta segir fjölskylduvinurinn Eddie Jordan, fyrrum stjórnandi samnefnds kappakstursliðs í Formúlu 1.
Mikið hefur mætt á Corinnu síðan slysið átti sér stað. Hún hefur verið einskonar verndarengill eiginmanns síns og séð um að friðhelgi einkalífs hans sé virt. Það hefur hún gert svo óaðfinnanlega að lítið hefur lekið út um ástand hans. Auk þess að stjórna öllu sem við kemur heimilislífinu og umönnun Michael þá hefur Corinna aðstoðað Mick, son þeirra, við feril hans sem Formúlu 1-ökumaður þar sem hann heldur Schumacher-nafninu á lofti.
Þá ræðir hún svo gott sem aldrei við fjölmiðla og því gaf viðtali við fjölskylduvininn Jordan sjaldgæfa sýn inn í líf Schumacher-fjölskyldunnar. Hann upplýsir að skömmu eftir slysið hafi Corinna bannað sér að hitt Michael vin sinn. Þá ákvörðun segist hann skilja fullkomlega.
„Þetta er hræðileg staða fyrir Corinnu og Mick. Í tíu ár hefur Corinna ekki getað farið í partý, hitt vini sína í hádegisverð eða slíka eðilega hæuti. Hún er eins og fangi og ástæðan er sú að allir vilja ræða við hana um stöðuna á Michael og hún þarf síst af öllu á því að halda að vera stöðugt minnt á stöðu mála.
Eftir slysið ákvað Corinna að aðeins nánasta fjölskylda fengi að heimsækja sjúkrabeð Michael. Eina undantekningin á því var annar fjölskylduvinur, Jean Todt, fyrrum yfirmaður Ferrari.
„Friðhelgin skiptir svo miklu máli í íþróttum, viðskiptum og einkalífinu. Corinna setti stífar reglur eftir slysið og leyfði bara fáum að Michael sem er skiljanlegt enda var ágangurinn mikill. Hún sendi mér hlýjar og fallegar kveðjur og sagðist þurfa að takmarka gestaganginn. Hún er afar indæl og ég hef þekkt hana lengi, meira að segja áður en hún og Michael fóru að stinga saman nefjum,“ segir Jordan.
Jordan stjórnaði samnefndu F1-liði frá árinu 1991 þar sem Michael og bróðir hans Ralf stigu sín fyrstu skref í íþróttinni. Jordan seldi svo liðið árið 2005 en hefur síðan verið viðloðandi íþróttina sem sérfræðingur í fjölmiðlum.
Lítið er vitað um raunverulegt ástand Schumacher. Hann er sagður eiga í erfiðleikum með að tjá sig og fréttir af því að hann geti gengið sjálfur, sem á sínum tíma fóru á flug í fjölmiðlum, voru dregnar tilbaka. Corinna hefur lítið sem ekkert tjáð sig um eiginmann sinn en gerði undantekningu í Netflix-heimildarmyndinni Schumacher.
„Ég sakna Michael á hverjum degi. En það er ekki bara ég sem sakna hans. Börnin okkar, fjölskylda, faðir hans og allir sem umgengust hann. Það sakna allir Michael en hann er ennþá hér. Hann er öðruvísi en hann var en hann er enn hér og það veitir okkur styrk,“ sagði hún.
