John Kerry, sérstakur fulltrúi Bandaríkjastjórnar í loftslagsmálum, vakti gífurlega athygli fyrir ræðu sína á loftlagsráðstefnunni COP28, sem fer nú fram í Dubai. Þar fór Kerry með ræðu um stefnu Bandaríkjanna gagnvart verksmiðjum sem knúnar eru áfram af kolum, en undir lok ræðunnar heyrðist vindur leystur úr læðingi.
„Það ættu ekki að leyfa verksmiðjur sem knúnar eru fyrir kol nokkurs staðar í heiminum,“ sagði Kerry og hélt áfram: „Ég finn sjálfan mig verða herskárri með tímanum því ég bara næ því ekki hvernig fullorðið fólk í ábyrgðarstöðu getur vikið sér undan þeirri ábyrgð að fjarlægja þessa hluti sem eru að drepa fólk daglega….“
Áður en Kerry komst lengra heyrðist hljóð sem mætti túlka sem fret. Ekki virðist það hafa truflað viðstadda sem klöppuðu. Kerry sat við hlið Becky Anderson, ritstjóra hjá CNN í Abu Dhabi, en hún sást í kjölfar ræðunnar setja hönd fyrir nef sér.
„Raunveruleikinn er að loftslagsváin og heilbrigðisváin er sú eina og sama,“ hélt Kerry ótrauður áfram.
Fjölmiðlamaðurinn Larry O’Connor hjá Townhall Media segir að vindgangur Kerry hafi orðið Bandaríkjunum til skammar.
„Stærsta vandamálið er, að á meðan þessu stóð, þar sem hann talaði fyrir okkur, Bandaríkin, þá rak hann við. Hann leysti vind á alþjóðlegum vettvangi.“
O’Connor segir erfitt fyrir Kerry að þræta fyrir prumpið og ljóst sé að loftslagsfulltrúinn þurfi að svara fyrir vindganginn. „Hann ætti að missa vinnuna undireins. John Kerry prumpaði“
Eftir stendur spurningin hvort að umdeilda hljóðið sé í raun og veru prump. Mögulega hefur annar fulltrúi á ráðstefnunni gleymt að slökkva á hljóðnema og andvarpað eða einhver fært stól. Kannski brakaði í stólnum?
Þó meint prump hafi ekki verið staðsett kom það ekki í veg fyrir þórðargleði á samfélagsmiðlum. Þar hlakkar sérstaklega í þeim sem hafa litla trú á því að loftlagsváin sé raunveruleg og þeim sem segjast hafa tekið inn svokallaða rauða pillu. Ein höfðu margir gaman að aðstæðum – að Kerry hafi losað gróðurhúsalofttegund á sviði loftlagsráðstefnu.
Listen at .33 seconds. What was that, John Kerry? pic.twitter.com/1chiGLz7Io
— The Post Millennial (@TPostMillennial) December 5, 2023