Þetta kemur fram í nýrri rannsókn sem hefur verið birt í vísindaritinu Nature.
Niðurstöðurnar eru þvert á hugmyndirnar um það sem er þekkt sem Uto-Aztekan tungumálin en í þeim hópi eru tungumál Azteka, Nahuatl, Hopi og Shoshoni. Þessar hugmyndir ganga út á að þessi tungumál hafi borist norður á bóginn með innflytjendum frá Mexíkó sem hafi að auki haft með sér tæknikunnáttu varðandi maísrækt.
Live Science hefur eftir Nathan Nakatsuka, aðalhöfundi rannsóknarinnar, að þessi uppgötvun sé mjög mikilvæg til að öðlast skilning á flutningi Azteka og annarra þjóða norður á bóginn.
Niðurstaða rannsóknarinnar byggist á rannsóknum á tönnum og beinum úr 79 einstaklingum. Þau fundust við fornleifauppgröft í mið- og suðurhluta Kaliforníu. Þessar leifar eru 7.400 til 200 ára gamlar. Einnig var notast við DNA-sýni úr líkamsleifum 40 manns, sem fundust í norðvestur og miðhluta norðurhluta Mexíkó. Þessar líkamsleifar eru 2.900 til 500 ára gamlar.
Með því að bera erfðamengi saman fundu vísindamennirnir sannanir fyrir að fólksstraumur hafi verið frá norðurhluta Mexíkó til Kaliforníu fyrir um 5.200 árum.