Kona nokkur sem býr í San Francisco í Bandaríkjunum varð fyrir því að reikningur vegna útkalls sjúkrabíls fór í innheimtu eftir að hún greiddi hann ekki. Reyndist reikningurinn hafa verið sendur á Golden Gate brúnna, þekktasta kennileiti borgarinnar, en vart þarf að taka fram að konan býr ekki á brúnni.

Þetta kemur fram í umfjöllun San Francisco Chronicle.

Konan heitir Kathryn Hall og í lok árs 2021 og í byrjun ársins 2022 bárust henni innheimtuviðvaranir vegna ógreidds reiknings sem tilkominn var vegna þess að 2018 hafði hún lent í hljólreiðaslysi á Golden Gate brúnni og sjúkrabíll var kallaður til. Reikningurinn var sagður hljóða upp á 2.200 dollara(tæplega 300.000 íslenskar krónur).

Hall kannaðist ekki við að hafa fengið slíkan reikning. Hún er vel tryggð og gerði einfaldlega ráð fyrir að sjúkratrygging hennar myndi dekka sjúkrabílaferðina. Svo vill til að Hall starfar í sjúkratryggingageiranum. Reikningurinn var frá slökkviliði San Francisco en tæplega 6 og hálfur kílómetri er frá slysstaðnum á spítalann sem hún var flutt á.

Eftir að innheimtuviðvaranirnar bárust greiddi Hall reikninginn, með nokkrum trega þó, í lok janúar 2022. Að því loknu hafði hún samband við gjaldheimtu San Francisco borgar og bað um að fá eintak af upprunalega reikningnum svo hún gæti fengið hann endurgreiddan.

Það tók nokkra mánuði að fá óskina uppfyllta en þegar reikningurinn barst sá Hall strax af hverju hún fékk hann aldrei. Reikningurinn hafði verið sendur á heimilisfang á Golden Gate brúnni en eins og áður segir býr hún alls ekki á brúnni.

Hún bjóst við að það yrði einfalt eftir þetta að fá reikninginn endurgreiddan en tryggingafélag hennar vísar á borgina og fyrirtækið sem sendir út reikninga vegna sjúkrabílaútkalla sem vísa aftur á móti á tryggingafélagið. Trygging hennar hefði með réttu átt að greiða 90 prósent af reikningnum en þar sem aðeins er um eins árs frestur til að gera kröfu um endurgreiðslu situr Hall uppi með reikninginn sem sendur var á þetta kolvitlausa heimilsfang. Hún segir málið fáranlegt að öllu leyti.

Hall greiddi reikninginn með kreditkorti og það tók hana heilt ár að borga kreditkortareikninginn.

Hún hefur kannað allar mögulegar leiðir til að fá reikninginn endurgreiddan og minnt á að það sé ekki hennar sök að hann hafi verið sendur á vitlaust heimilisfang. Yfirvöld í Kaliforníu vísa kröfum hennar á bug og segja að 1 árs kröfufresturinn sé liðinn og ekkert verði gert í málinu.

Talsmaður rekstraraðila Golden gate brúarinnar segir að reikningurinn hafi aldrei borist þangað en heimilisfangið á reikningnum er ekki til.