Maður í Illinois í Bandaríkjunum var stálheppinn nýlega þegar hann vann 25 þúsund dali árlega út lífið í lottóleiknum Lucky For Life. Michael Sopejstal, sem er sextugur, keypti miðann sinn með tölunum 11, 15, 17, 24 og 48, á GoLo bensínstöðinni í New Buffalo í Michigan.

Sopejstal segir að það sé mistökum afgreiðslumannsins að þakka að hann vann.

„Ég fæ mér alltaf Lucky For Life miða fyrir 10 – 20 útdrætti þegar ég fer á bensínstöðina. Ég bað afgreiðslumanninn um miða fyrir 10 útdrætti, en hann prentaði miða með 10 línum fyrir einn útdrátt, en ég sagðist samt ætla að kaupa hann. Ég kíkti svo á miðann einn morguninn og sá að ég hafði unnið 25 þúsund dali á hverju ári það sem ég á eftir ólifað. Ég fór strax að hugsa um alla hlutina sem mig langaði að gera við peningana og hvort mig langaði að fá vinninginn greiddan árlega eða taka eingreiðslu. Þetta var frábær tilfinning!“

Sopejstal ákvað sig á endanum og rölti inn á skrifstofur lottósins til að sækja vinninginn. Hann tók eingreiðslu upp á 390 þúsund dali, í stað 25 þúsund dala í 20 ár (eða út lífið eftir hvort tímabilið væri lengra). Hyggst hann ferðast og leggja hluta af vinningnum fyrir.

Sopejsal býr í Illinois en fer á nokkurra vikna fresti til Michigan til að borða á uppáhaldsveitingastaðnum sínum. Sem hlýtur að vera ansi góður þar sem aksturinn er um sex klukkutímar, sem þó borgaði sig allverulega daginn sem lottómiðinn var keyptur. 

Lottómiðinn líkt og Sopejstal keypti kostar tvo dali, og gefur möguleika á að vinna frá þremur dölum upp í þúsund dali greidda hvern dag út lífið, eða „For Life“ eins og lottóið auglýsir. Spilarar þurfa að vera með fimm vinningstölur réttar, en tölurnar eru frá 1 – 48, og Lucky Ball (Lukkukúluna) frá 1-18 til að vinna stóra vinninginn. Þeir sem eru með fimm tölur réttar, en ekki Lukkukúluna, vinna líkt og Sopejstal 25 þúsund dali árlega út lífið. Dregið er daglega en möguleikarnir á að vinna vinning þegar Sopejstal vann voru 1 á móti 1,8 milljón samkvæmt heimasíðu lottósins.