Snjallsímar gætu verið að breyta því hvernig heilinn í okkur starfar. Þetta var niðurstaða nýrrar rannsóknar, en niðurstöðurnar voru kynntar á dögunum í læknaritinu Psychiatry Research: Neuroimaging.

Óhófleg notkun á snjallsímum var í rannsókninni tengd við minni styrk í lykilkerfum heilans sem sjá um hugsanastjórn og stýrifærni.

Rannsóknin var gerð í tilefni af auknum áhyggjum af áhrifum snjallsíma á andlega heilsu og daglegt líf. Undanfarin ár hefur umræðan um ofnotkun snjalltækja orðið fyrirferðameiri og hafa nú þegar nokkrar rannsóknir bent til neikvæðra áhrifa snjalltækja á líkamlega, andlega og félagslega velferð. Rannsakendur freistuðu þess nú að kanna betur tengsl milli óhóflegrar notkunar snjallsíma á hugræna þætti svo sem athygli, ákvarðanatöku og minni.

Rannsakendur völdu 39 einstaklinga út frá aldri, tungumálakunnáttu og sjúkrasögu. Leitað var að þátttakendum sem höfðu ekki sögu um taugaþroskaraskanir eða andleg veikindi. Síðan var þátttakendum skipt í tvo hópa – annars vegar þá sem nota snjalltæki óhóflega, og hins vegar samanburðarhóp sem notar snjalltæki innan skynsamlegra marka. Hver þátttakandi gekkst undir ítarlegt mat, svo sem mat á snjalltækjafíkn sem og mat á andlegri heilsu.

Síðan var heili þeirra skoðaður í segulómun á meðan þau framkvæmdu tiltekin verkefni. Niðurstöður sýndu að hópurinn sem notaði snjalltæki óhóflega var með minni virkni í kerfi heilans sem er mikilvægt fyrir einbeitingu, athygli og stjórn á hvötum. Þessi niðurstaða rímar við niðurstöður úr öðrum fíknirannsóknum. Frekari rannsókna sé þörf, en hér séu vísbendingar um að símafíkn sé vissulega raunveruleg og hafi svipuð áhrif á heilavirkni og aðrir fíknivaldar.