Hin tvítuga Connie Lorraine Christensen sást síðast í Nashville, Tennessee, í apríl 1982, að sögn yfirvalda, samkvæmt Associated Press. Hún hafði skilið eins árs dóttur sína eftir hjá ættingjum, en talið var að hún væri gengin þrjá til fjóra mánuði með sitt annað barn. Þegar hún kom ekki heim eins og til stóð tilkynnti fjölskylda hennar að hennar saknað.
Átta mánuðum síðar, 26. desember 1982, fundu veiðimenn beinagrind konu í gaffli trés þegar þeir voru á göngu meðfram Martindale Creek nálægt Jacksonburg, dreifbýli sem staðsett er tæplega 100 kílómetrum austur af Indianapolis.
Konan var klædd í háhælaða viðarsólaklossa, bláa langerma blússu, gráar síðbuxur, bláa eða gráa prjónasokka og bláan nælonjakka. Hún bar líka gullhring með ópal og tveimur demöntum.
Þegar líkamsleifarnar fundust grunaði yfirvöld að um glæp væri að ræða, en engin dánarorsök var ákveðin. Rannsakendur töldu einnig að óþekkta konan hefði verið látin í allt að átta mánuði. Morðmálið varð að lokum eitt þeirra sem ekki tókst að leysa, svokallað Cold Case.
Málið var tekið upp að nýju þegar skrifstofa Wayne County Coroner’s fór í samstarf við DNA Doe Project til að aðstoða við að bera kennsl á líkamsleifar konunnar. DNA sem náðist úr líkamsleifunum leiddi til samsvörunar við tvo ættingja Christensen með því að nota erfðafræðilega ættfræði. En yfirvöld telja í dag að Christensen hafi látist af völdum skotsárs. Ekki hefur verið greint frá því að einhver sé grunaður um manndrápið.
„Að taka DNA próf og hlaða upp á GEDmatch er besta leiðin fyrir fjölskyldur týndra einstaklinga til að hjálpa stofnunum eins og okkar að gera þessar auðkenningar,“ segir Lori Flowers sem starfar hjá DNA Doe Project í yfirlýsingu.
