Merapifjall er eitt virkasta eldfjall Indónesíu og hefur það verið á hættustigi frá árinu 2011 vegna mikillar virkni. Af þeim sökum hefur göngufólki verið meinað að ganga upp á topp fjallsins, að því er fram kemur í frétt AP.
Hendra Gunawan, yfirmaður hjá stofnun í Indónesíu sem svipar til almannavarna, segir við AP að göngumenn hafi í gegnum tíðina virt þessar reglur að vettugi og afleiðingarnar nú séu skelfilegar.
Um 75 göngumenn lögðu af stað á fjallið á laugardag en það er þrjú þúsund metra hátt. Átta voru fluttir á sjúkrahús í gær, ýmist með brunasár eða beinbrot. Á myndum á samfélagsmiðlum mátti sjá öskuský teygja sig hátt til himins og þá voru smáþorp í nágrenni fjallsins þakin ösku.
Eldgos hafa verið tíð í Merapifjalli á undanförnum árum en það gaus til dæmis árin 2021, 2018, 2010 og 2006.