Bresk móðir ætlar sér að rukka fjölskyldu sína um 150 pund (rúmar 26.000 íslenskar krónur) fyrir máltíð sem hún mun elda og hafa til reiðu á jóladag. Mun aðalrétturinn verða kalkúnn og með fylgir eitt glas af kampavíni. Konan segir að hún eigi ekki að þurfa að leggja út fyrir jólamatnum úr eigin vasa og hefur áður sagt að allt sem hún geri geri hún til að græða peninga.
Umrædd kona heitir Carla Bellucci og hefur áður verið í fréttum í Bretlandi en hún viðurkenndi að hafa þóst vera með þunglyndi til að opinbera heilbrigðiskerfið, NHS, myndi greiða nefaðgerð fyrir hana. Eftir það var hún sögð hataðasta kona Bretlands. Hún hefur einnig vakið athygli fyrir að segja að dóttir hennar ætti að fara í fegrunaraðgerðir og þurfi að treysta á útlitið til að ná langt í lífinu.
Bellucci segir að von sé á 15 fjölskyldumeðlimum í jólamatinn.
Hún segir að eflaust sé hægt að finna stað með ódýrari jólamat en það sé meiri klassi yfir matnum hennar. Jólamatur á hefbundnum veitingastöðum og hótelum sé hins vegar dýrari en hjá henni og þess vegna ætti hún ekki að greiða allan kostnað við jólamatinn úr eigin vasa.
Bellucci segir að kveikt verði á sjónvarpinu þannig að fjölskyldan geti horft á árlegt jólaávarp Karls konungs eða hvað annað sem hún vilji horfa á. Hún segir að fjölskyldusamkoman muni enda á látbragðsleik en klukkan 10 á jóladagskvöld verði húsinu lokað og þeim fjölskyldumeðlimum sem ekki eru búsettir þar verði þá vísað út.
Mirror greindi frá.
