Franskur karlmaður á sjötugsaldri hefur verið dæmdur fyrir manndráp af gáleysi. Hlaut hann eins árs skilborðsbundið fangelsi. Maðurinn flaug flugvél sem fallhlífarstökkvari stökk út úr með þeim afleiðingum að vængur flugvélarinnar fór utan í stökkvarann og varð það honum að bana.
Atvikið átti sér stað árið 2018 yfir bænum Bouloc sem er skammt frá borginni Toulouse í suðvesturhluta Frakklands.
Í skýrslu franskra samgönguyfirvalda, vegna málsins, kemur fram að vinstri vængur flugvélarinnar hafi lent á fallhlífarstökkvarann nokkrum sekúndum eftir að hann stökk út. Maðurinn sem stökk hafi látist samstundis.
Sá látni var 40 ára gamall karlmaður. Hann var fyrstur úr hópi 10 fallhlífarstökkvara, sem voru um borð, til að stökkva út úr flugvélinni sem var af tengundinni Pilatus PC-6.
Í skýrslunni segir að flugmaðurinn hafi eftir að maðurinn stökk út lækkað flugið og beygt til vinstri og þar með talið sig hafa vikið frá leið stökkvaranna niður á jörðina en nokkrum sekúndum seinna hafi hann fundið högg þegar hann flaug á hinn látna.
Í skýrslunni segir að margt hafi getað átt þátt í slysinu. Þar á meðal samskiptaleysi milli flugmannsins og hóps fallhlífarstökkvaranna og einnig að flugmaðurinn hafi lækkað flugið snögglega án þess að sjá hvar fallhlífarstökkvarinn var.
Flugmaðurinn var einn við stjórn flugvélarinnar þegar slysið átti sér stað en af heilsufarsástæðum hafði hann ekki leyfi til að fljúga einn.
Fallhlífarstökkskólinn sem flugmaðurinn starfaði hjá segist nú hafa breytt vinnulagi sínu og hert reglur um vottorð og leyfi til að fljúga flugvélum á vegum skólans.
Fyrir utan skilorðsbundna fangelsisdóminn bannaði dómstólinn manninum að fljúga flugvélum í eitt ár.
CNN greindi frá.
