Á jóladag árið 2021 braust maður inn á lóð Windsor-kastala vopnaður lásboga. Var ætlun mannsins að myrða Elísabetu II drottningu Bretlands. Maðurinn var hins vegar handtekinn áður en hann náði að ógna drottningunni á nokkurn hátt og var í kjölfarið ákærður fyrir landráð. Hann hefur nú beðist afsökunar:
Hann heitir Jaswant Sing Chail og var 18 ára þegar hann var handtekinn en er í dag orðinn 21 árs. Chail játaði að hafa gerst sekur um landráð og hefur síðan hann var handtekinn verið vistaður á viðeigandi geðsjúkrahúsi.
Fyrir rétti fyrr í dag, þar sem núverandi andlegt ástand Chail var til umfjöllunar, opinberaði lögmaður hans að Chail hefði skrifað Karli III konungi og fjölskyldu hans bréf og beðist afsökunar á athæfi sínu. Lögmaðurinn sagði Chail skammast sín fyrir að hafa komið með slíkan hrylling að dyrum fjölskyldunnar og hafa ollið henni áhyggjum. Chail sé létt að enginn hafi meiðst.
Fjölskylda Chail segir að hann hafi verið góður, blíður og oft fyndinn áður en andlegri heilsu hans fór að hraka. Lögmaður hans segir að lokunaraðgerðir breksra stjórnvalda í covid- faraldrinum hafi átt mikinn þátt í hversu slæm andlega heilsa hans varð.
Fjölskyldan er sögð mjög náin en faðir Chail er hugbúnaðarsérfræðingur og starfar í flugvélaiðnaðinum. Móðir hans starfar við kennslu barna með sérþarfir og tvíburasystir hans er háskólanemi.
Lögmaðurinn segir fjölskyldunni hafa verið gífurlega brugðið vegna athæfis Chail. Hin djúpa iðrun hans muni fylgja honum út lífið ekki síst vegna alvarleika þess brots sem hann gerðist sekur um.
Chail, sem er frá Southampton í Bretlandi, mun vera mikill Star Wars aðdáandi og hafði talið sjálfum sér trú um að hann væri persóna úr kvikmyndabálknum heimsþekkta og kallaði sig Darth Chailus. Hann var klæddur dökkum fötum og með grímu úr málmi yfir andlitinu.
Áður en hann hélt til Windor-kastala sendi hann fjölskyldu sinni og vinum skilaboð og baðst afsökunar á því sem hann ætlaði sér að gera.
Chail sagði árás hans vera hefnd fyrir fjöldamorð í borginni Amritsar í Indlandi árið 1919 en þá myrtu breskir hermenn þúsundir Indverja. Chail og fjölskylda hans eru af indversku bergi brotin, nánar tiltekið síkhar.
Saksóknari sagði fyrir réttinum í dag að sú staðreynd að boginn var hlaðinn ör sem hægt var að skjóta með minnsta mögulega fyrirvara ætti að hafa í för með sér lengri dóm yfir Chail. Ef Chail hefði lyft boganum á lóð Windor-kastala segir saksóknarinn að í því hefðu falist þrenns konar lögbrot sem öll hefðu í för með sér lífstíðardóm.
Dómari mun skera úr hvort Chail verður fluttur í fangelsi eða vistaður áfram á stofnun fyrir geðsjúka. Það kemur einnig til greina að hann muni sæta blandaðri vistun.
Geðlæknir hans mælir með því að Chail verði áfram vistaður á meðferðarstofnuninni og telur hann þurfa að njóta meðferðar í a.m.k. 18 mánuði í viðbót.
Annar geðlæknir, sem bar vitni fyrir ákværuvaldið, segir hins vegar að Chail hafi skipulagt árásina í þaula og að hann hafi væri vel meðvitaður um að hann væri að breyta rangt.
Chail hefur einnig viðurkennt að hafa hótað, áður en hann framdi árásina, að myrða Elísabetu drottningu. Dómur um hvar hann verður vistaður í nánustu framtíð og hversu lengi verður kveðinn upp 5. október.
Það var Skynews sem greindi frá.
