Maður að nafni Fabian Marta tók þátt í hópfjármögnun á kvikmyndinni Sound of Freedom sem fjallar um mansal og kynlífsþrælkun á börnum. Marta hefur hins vegar nú verið ákærður fyrir meinta aðild að ráni á barni.

Hann var handtekinn 23. júlí síðastliðinn af lögreglunni í borginni St. Louis í Bandaríkjunum og ákærður fyrir aðild að barnsráni vegna atviks sem átti sér stað 21. júlí. Marta var látinn laus og á að mæta næst fyrir rétti 28. ágúst næstkomandi.

Lögmaður Marta segir að ákæran eigi sér enga stoð í veruleikanum. Málið virðist snúast um rán forsjáslaus foreldris á barni og lögmaðurinn segir það tengjast fasteign sem Marta á en er með í útleigu, það séu hins vegar einu tengsl hans við málið.

Engar nánari upplýsingar hafa verið veittar um málið.

Marta er 51 árs og var einn þeirra sem kom að fjármögnun Sound of Freedom. Kvikmyndin er leikin en byggir á sögu hins raunverulega Tim Ballard en Jim Caviezel leikur hann í myndinni.

Ballard starfaði sem rannsóknarfulltrúi hjá heimavarnarráðuneyti Bandaríkjanna og kom aðallega að málum sem vörðuðu mansal og kynlífsþrælkun á börnum.

Myndin hefur verið kynnt sem saga af baráttu Ballard gegn þessum óhugnaði á alþjóðalega vísu og hvernig hún á endanum snúist um þrá eftir frelsi.

Sound of Freedom hefur hins vegar verið gagnrýnd fyrir að fara frjálslega með hina raunverulegu sögu Tim Ballard og að gefa samsæriskenningum, um að valdamiklir aðilar með tengsl við Demókrataflokkinn í Bandaríkjunum hafi myndað með sér mansals- og barnaníðshring, undir fótinn.

Aðdáendur myndarinnar hafna hins vegar gagnrýninni og segja um að ræða ofsóknir öfgafullra vinstri manna.

Það var E-Online sem greindi frá.