Breski fjölmiðilinn Mirror greinir frá því að 10 barna móðir frá Bretlandi sé meðal þeirra sem létust í fjöldaárekstri á A-26 hraðbrautinni í norðurhluta Frakklands í gær.

Tvær aðrar manneskjur létust í árekstrinum og þó nokkur slösuðust þar á meðal börn.

Mirror segir að móðirin hafi verið 50 ára gömul en í upphafi fréttarinnar segir raunar að hún hafi verið 40 ára.

Hún hét Miriam Posen, frá norðurhluta London, og var á ferðalagi ásamt fjölda fjölskyldumeðlima. Fjölskyldan er hluti af samfélagi réttrúaðra gyðinga í Bretlandi.

Eiginmaður hennar, rabbíninn Shalom Pinchos Posen, var þar á meðal en hann liggur nú alvarlega slasaður á sjúkrahúsi. Tvær dætur hjónanna eru einnig alvarlega slasaðar.

Þau voru öll farþegar ásamt þremur öðrum fjölskyldumeðlimum í sendibíl sem ætlaður er til farþegaflutninga.

Miriam er sögð hafa látist samstundis.

Önnur sem létust voru farþegar í öðrum bíl. Það voru 45 ára gamall karlmaður og 75 ára gömul kona. Auk þeirra voru 14 ára drengur og 79 ára gamall karlmaður í bílnum og eru báðir alvarlega slasaðir.

Í þriðja bílnum sem lenti í árekstrinum var einn fullorðinn einstaklingur og þrjú börn.

Sex bráðateymi og 60 slökkviliðsmenn voru sendir á vettvang.

Opinber rannsókn er hafin á tildrögum þessa skelfilega slyss.

Vitnum að árekstrinum hefur verið boðin áfallahjálp.

Segir í frétt Mirror að um þessar mundir séu þúsundir Breta á ferð um Frakkland.

Elsti sonur Miriam, Izzy Posen, sagði í færslu á samfélagsmiðlum að móðir hans hafi verið full af lífi og honum hafi þótt afar vænt um hana.

Talsmaður fjölskyldunnar sagði í yfirlýsingu að Miriam hafi verið ástrík móðir og verið elskuð af fjölskyldu og vinum. Hún hafi verið einstök persóna og hennar verði sárt saknað en fjölskyldan sé enn að meðtaka að hún sé látin.