Lögreglan hefur unnið að rannsókn málsins í þau rúmlega sjö ár sem eru liðin síðan Emilie var myrt en það var ekki fyrr en í apríl sem annað mál varð til þess að hún hafði uppi á meintum morðingja.
Rannsóknin hefur ekki verið laus við mistök og það hefur lögreglan viðurkennt.
Meðal þeirra mistaka sem lögreglan hefur gert að hafa ekki aflað sér upptakna úr eftirlitsmyndavélum á veitingastað McDonald‘s í Slagelse en þangað fóru Emilie og vinkonur hennar áður en þær fóru heim til Køge með lest. Þegar þær fóru á veitingastaðinn hafði skap Emilie breyst mikið og hún var ekki lengur í skapi til að skemmta sér.
„Ég hugsaði með mér að eitthvað væri að. Ég held að Emilie hafi grátið alla leiðina til McDonald‘s,“ sagði Nicole Gundtoft, vinkona hennar sem var með þessa nótt, í sjónvarpsþættinum „Forbrydelser der rystede Danmark“ árið 2019 en í þættinum var fjallað um morðið á Emilie. Nicole sagði að Emilie hafi verið mjög döpur á leið á veitingastaðinn eftir að hafa fengið skilaboð á Messenger frá einhverjum sem hún hafði átt í sambandi við. En lögreglan aflaði sér ekki upptakna úr eftirlitsmyndavélunum og þeim var eytt eftir 30 daga eins og venja er. Mai-Brit Storm-Thygesen, lögmaður fjölskyldu Emilie, sagði í sjónvarpsþættinum „Hvor er politiet“ að þarna gætu mikilvægar vísbendingar hafa leynst og nú séu þær glataðar að eilífu.
Lögreglan aflaði heldur ekki upptakna úr eftirlitsmyndavélum við fjóra einkavegi sem liggja frá lestarstöðinni í Korsør en þar gæti morðinginn hafa ekið bíl sínum. Lögreglan reyndi þó að fá þessar upptökur en um seinan, það var búið að eyða þeim. Lögreglan hefur viðurkennt að þessara upptakna hafi ekki verið aflað þar sem málið hafi í fyrstu verið meðhöndlað sem leit en ekki mannshvarf og morð. Ef svo hefði verið hefði rannsókninni verið háttað á annan hátt.
Lögreglan aflaði sér þó upptöku úr eftirlitsmyndavél á lestarstöðinni í Korsør og á grundvelli hennar lýsti hún eftir hvítri Hyundai bifreið en eigandi hennar hefur ekki gefið sig fram.
Ein af þungamiðjunum í rannsóknargögnum lögreglunnar eru gögn úr farsímakerfum. Lögreglan aflaði sér gagna um þá síma sem voru notaðir nærri lestarstöðinni og við vatnið í Borup á ákveðnum tímum. Ef þessi gögn eru lesin á réttan hátt er hægt að staðsetja með mikilli nákvæmni hvar símar og þá notendur þeirra voru staðsettir á ákveðnum tímapunktum. En 2018 uppgötvaði lögreglan að villur voru í þessum gögnum. Það vantaði gögn fyrir heila klukkustund og fjöldi símamastra voru ekki staðsett þar sem gögnin sýndu að þau væru. Gagnrýnendur segja að þessi röngu og ónákvæmu gögn hafi orðið til þess að morðinginn gat leynst fyrir lögreglunni. Lögreglan hefur ekki viljað svara því hvaða áhrif þetta gæti hafa haft á rannsóknina. Þessi mistök voru leiðrétt 2019 og þá fékk lögreglan öll þau gögn og símanúmer sem hafði vantað.
Peter Madsen, sem afplánar nú ævilangan fangelsisdóm fyrir morðið á sænsku fréttakonunni Kim Wall, var í kastljósi lögreglunnar vegna morðsins á Emilie. Að minnsta kosti þrisvar sinnum skoðaði lögreglan hvort hann gæti tengst málinu og hún var með sendibíl, sem Madsen var með á leigu, í sinni vörslu um hríð.
Þetta er hvítur sendibíll en ekki Hyundai eins og lögreglan lýsti eftir.
Nú í apríl var 32 ára karlmaður handtekinn, grunaður um að hafa numið 13 ára stúlku á brott á Sjálandi, nærri Korsør, og að hafa haldið henni nauðugri á heimili sínu þar sem hann nauðgaði henni ítrekað. Nokkrum dögum eftir handtökuna tilkynnti lögreglan að hann væri grunaður um morðið á Emilie Meng.
Lögreglan vill ekki gefa mikið um vegna rannsóknarhagsmuna en sagði þó hafa komið höndum yfir bíl af tegundinni Hyundai i30, sem maðurinn átti árið 2016. Sama ár og Emilie var myrt. Bíllinn fannst i Slóvakíu.
Sami maður er einnig sakaður um hótanir og tilraun til að nauga 15 ára stúlku í nóvember síðastliðnum.
En stóra spurningin, sem margir velta fyrir sér, er hvort lögreglan hefði getað haft hendur í hári hins meinta morðingja mun fyrr en raunin er.
