Hæstiréttur Perú hefur fallist á að heimila framsal á hollenska morðingjanum Joran van der Sloot sem afplánar 28 ára fangelsisdóm í landinu fyrir morðið á hinni 21 árs gömlu Stephany Flores árið 2010. Van der Sloot var sakfelldur fyrir að lemja hana og kyrkja á hótelherbergi eftir að hafa hitt Flores fyrir tilviljun á spilavíti.

Van der Sloot er hins vegar einnig efstur á lista grunaðra yfir þá sem taldir eru hafa komið að hvarfi hinnar bandarísku Natalee Holloway á karabísku eyjunni Aruba árið 2005.  Hann hefur reglulega tjáð sig um aðkomu sína að hvarfinu í fjölmiðlum í gegnum árin. Meðal annars hefur hann sagst hafa selt Holloway, sem var í útskriftarferð í Aruba, til mansalshrings og að hann hafi drepið hana og komið líkinu fyrir í ótilgreindu feni. Síðar hefur hann dregið þessar fullyrðingar tilbaka og sagt að þær hafi aðeins verið settar fram til þess að fá athygli.

Van der Sloot hefur nú verið ákærður fyrir að fjárkúga fjölskyldu Holloway fyrir allt að 250 þúsund dollara, um 35 milljónir króna. Hann er sagður hafa óskað eftir peningagreiðslu gegn því að veita upplýsingar um hvar lík hennar sé að finna. Fjölskylda Holloway á að hafa millifært inn 10 þúsund dollara, andvirði 1,4 milljónir króna, inn á bankareikning Van der Sloot en aldrei fengið neinar frekari upplýsingar um hinsta hvílustað stúlkunnar.

Búist er að við að hollenski morðinginn verði framseldur á næstu vikum en hann á yfir höfði sér allt að 20 ára fangelsi verði hann fundinn sekur  í Bandaríkjunum. Talið er að það sé líklega ætlun hans enda séu bandarísk fangelsi talsvert skárri en perúvísk fangelsi.