Í nýrri rannsókn, sem hefur verið birt í vísindaritinu Nature, segja vísindamenn að heimurinn verði að undirbúa sig undir risastór eldgos. Þeir segja að gera verði meira til að spá fyrir um slík gos og einnig til að undirbúa viðbrögð við slíkum atburði sem myndi valda miklum hamförum. Norska ríkisútvarpið skýrir frá þessu.
Dr Lara Mani, einn af höfundum rannsóknarinnar og sérfræðingur í alþjóðahættu, sagði að gögn sýni að líkurnar á ofureldgosi á næstu 100 árum séu um 17%.
Í janúar gaus neðansjávareldfjallið Hunga Tonga Hunga Ha‘apai. Sprengingin, sem fylgdi gosinu, er sú öflugasta sem nokkru sinni hefur mælst.
Mani telur að ofureldgos geti haft sömu afleiðingar og að eins kílómetra breiður loftsteinn skelli á jörðinni. „Slíkir atburðir myndu hafa svipaðar afleiðingar fyrir loftslagið en líkurnar á hamfaragosi eru hundrað sinnum meiri,“ sagði hún.
Hún sagði að penginum sé „dælt“ í vöktun á loftsteinum og halastjörnum en mikið fé vanti til að hægt sé að fylgjast með eldfjöllum og gera viðeigandi ráðstafanir um viðbrögð við stórum eldgosum. „Þessu verður að breyta. Við vanmetum algjörlega þá hættu sem samfélaginu okkar stafar af þessu,“ sagði hún.
Rannsóknir á brennisteini í gömlum íssýnum gefa vísbendingar um hvað framtíðin getur borið í skauti sér. Þessi gömlu sýni benda til að eldgos, tíu til hundrað sinnum stærri en sprengingin í Tonga Honga í janúar, eigi sér stað á 625 ára fresti að meðaltali. Það er tvisvar sinnum oftar en áður var talið.
