Þetta gerðist þann 16. maí síðastliðinn. Tya, sem er 41 árs, var heima hjá sér í Lewisville í Texas ásamt Hercules, sem var Pitbull, auk nýja hvolpsins hennar, Roo. Einnig var vinur hennar, Peter, í húsinu en hann var kominn til að hitta Roo í fyrsta sinn.
Ekki liggur nákvæmlega hvað fór úrskeiðis en skyndilega réðst Hercules á Peter og síðan Tya.
„Hundurinn stökk upp á háls vinar míns og það byrjaði að blæða úr honum. Ég hugsaði bara: „Hver fjandinn“. Hundurinn sat bara fastur á hálsi hans,“ sagði Tya í viðtali við New York Post.
Hún reyndi að aðstoða vin sinn en þá snerist Hercules gegn henni.
„Ég man ekki sérstaklega mikið. Ég man að ég leit niður og kjötið var horfið af handleggnum,“ sagði Tya.
Hercules náði að bíta stóra hluta af hægri handlegg hennar af áður en hann læsti tönnunum í fót hennar og fótlegg. Tya öskraði á hjálp og skömmu síðar komu dóttir hennar og eiginmaður henni til aðstoðar.
Lögregla og sjúkraflutningamenn komu síðan á vettvang. Lögreglumönnum tókst að ná Hercules og Tya var flutt á sjúkrahús. Hún var meðvitundarlaus í nokkra daga og varð að fara í sex aðgerðir vegna áverkanna sem hún hlaut.
Tya veit ekki enn af hverju Hercules réðst á hana og Peter og segir að hann hafi aldrei áður sýnt af sér árásargirni. En eitt og annað bendir til að Hercules hafi gengið í gegnum miklar hremmingar áður en Tya tók hann að sér. Hún fann hann á götu úti fyrir tveimur árum. Þá var hann með fjölda brunabletta eftir sígarettur á líkamanum.
Hercules var aflífaður.
Tya er enn að reyna að jafna sig á afleiðingum árásarinnar og hefur hrundið söfnun af stað á GoFundMe til að greiða læknisþjónustu.
