Kvikmyndin Ókindin (e. Jaws) vakti gífurlega lukku þegar hún kom út árið 1975. Myndin sló aðsóknarmet og fékk góða dóma en þrátt fyrir það sér leikstjóri kvikmyndarinnar, Steven Spielberg, eftir áhrifunum sem kvikmyndin hafði á hákarla í heiminum.
„Ég sé virkilega, virkilega eftir þessu,“ sagði Spielberg í viðtali á BBC á sunnudaginn. „Ég óttast ennþá… að hákarlarnir séu á einhvern hátt reiðir út í mig.“
Samkvæmt rannsóknum fækkaði fjölda hákarla og skatna í heiminum um meira en 71% á milli áranna 1970 og 2018. Þá var greint frá því í fyrra að 37% af tegundum hákarla og skatna væru í útrýmingarhættu.
Chris Lowe, prófessor í sjávarlíffræði, segir í samtali við Washington Post um málið að þegar Ókindin kom út þá hafi orðið stefnubreyting í viðhorfi fólks til hákarla. Fólk hafi orðið neikvæðara í garð þeirra og að með því hafi orðið auðveldara að ofveiða þá.
Gavin Naylor, yfirmaður rannsókna á hákörlum í University of Florida, er þó ekki á því að þetta sé alfarið Spielberg og kvikmyndinni hans að kenna.
„Ég held að honum þurfi ekki að líða hræðilega,“ segir Naylor í samtali við Washington Post. Naylor segir að það hafi að vísu orðið einhver aukning á hákarlaveiðum hjá sumu fólki í kjölfar myndarinnar en að slíkt hafi þó verið í gangi löngu áður en myndin kom út.
