Bókasafnið nefnist „Z-library“ og hefur það fengið mikla athygli á TikTok.
Margir hafa líklega á einhverjum tímapunkti í lífi sínu hlaðið niður kvikmynd eða sjónvarpsþáttum á ólöglegum vefsíðum. En rússneska parið gekk skrefinu lengra því í rúman áratug virðast þau hafa rekið stærsta ólöglega „bókasafn“ heims með sjóræningjaeintökum af rafbókum. Þær stóðu fólki til ókeypis afnota. The Verge skýrir frá þessu.
Fram kemur að parið sé sakað um brot á höfundarrétti, peningaþvætti og svik. Búið er að loka bókasafninu varanlega.
Í safninu voru rúmlega 11 milljónir ólöglegra rafbóka og vísindagreina. Hægt var að lesa allt þetta efni ókeypis og hlaða því niður. Námsmenn voru mjög hrifnir af safninu því þar gátu þeir fundið margar bækur til að nota í námi sínu.
Vinsældirnar jukust mikið síðustu mánuði vegna þeirrar athygli sem safnið fékk á TikTok.
Myndbönd með myllumerkinu „zlibrary“ hafa fengið rúmlega 21 milljón áhorf á TikTok. Þessar vinsældir eru einmitt ein aðalástæðan fyrir því að augu yfirvalda fóru að beinast að safninu.
