Það er full ástæða til að velta því fyrir sér hvort sjötug bandarísk kona, sem nýtur nafnleyndar, sé heppnasta kona heims. Hún keypti sér nýlega skafmiða í Delaware og vann 100.000 dollara, sem svarar til rúmlega 14,5 milljóna íslenskra króna. En þar með var heppnin hennar ekki á enda.

Til að halda upp á vinninginn keypti hún sér fleiri skafmiða og vann þá 300.000 dollara til viðbótar eða sem svarar til 43,5 milljóna íslenskra króna.

Hún keypti tvo miða á bensínstöð um miðjan október og á öðrum þeirra var 100.000 dollara vinningur eftir því sem segir í fréttatilkynningu frá ríkislottóinu í Delaware.

Konan leysti vinninginn út þann 20. október í höfuðstöðvum lottósins í Dover, sem er höfuðborg Delaware.

Á leiðinni heim fagnaði hún vinningnum með því að kaupa sér þrjá skafmiða til viðbótar í verslun einni. Á einum þeirra var 300.000 dollara vinningur. The Guardian skýrir frá þessu.

Vinkona hennar var með í för og trúðu þær ekki eigin augum þegar þær sáu að hún hefði fengið annan risavinning.

Þær óku strax aftur í höfuðstöðvar lottósins og sóttu vinninginn.

Samkvæmt því sem talsmenn ríkislottósins í Delaware segja þá eru líkurnar á að vinna 100.000 dollara 1 á móti 120.000. Líkurnar á að vinna 300.000 dollara eru 1 á móti 150.000