Í júlí 1974 fannst lík af konu á milli kletta á Race Point Beach í Provincetown í Massachusetts í Bandaríkjunum. Það var 13 ára stúlka, sem var úti að ganga með hundinn sinn, sem fann líkið.

Það var ekki fyrr en nýlega sem alríkislögreglunni FBI tókst að bera kennsl á líkið en hendurnar vantaði á það þegar það fannst. Konunni hafði verið misþyrmt kynferðislega með tréhlut og reynt hafði verið að hálshöggva hana. Krufning leiddi í ljós að hún hafði látist af völdum höfuðáverka sem hún hlaut þegar hún var lamin í höfuðið. Síðan var lík hennar flutt á staðinn þar sem það fannst.

Eftir því sem segir í umfjöllun Dagbladet þá var líkið grafið margoft upp síðustu 48 árin til að rannsaka það enn frekar en það var ekki fyrr en nýlega sem þetta skilaði árangri.

Á fréttamannafundi sagði fulltrúi FBI að með því að notast við erfðarannsóknir og ættfræðirannsóknir hefði tekist að bera kennsl á konuna. Hún hét Ruth Marie Terry og var 37 ára þegar hún var myrt.

Morðinginn hefur ekki fundist og sagði saksóknari að yfirvöld telji að hann sé látinn.