Það hefur vakið reiði í Þýskalandi að dýraverndunarsamtökin Peta hafa hvatt konur til að grípa til verkfallsaðgerða í kynlífi þegar kemur að því að stunda kynlíf með körlum sem borða kjöt. Þeir bera því ábyrgð á meiri losun gróðurhúsalofttegunda að mati Peta.

Þetta fer illa í Þjóðverja sem eru þekktir fyrir ást sína á pylsum.

Þegar fulltrúar þýskalandsdeildar Peta kynntu hugmyndir sínar um kynlífsbann sögðu þeir að konur verði „að fara í kynlífsverkfall til að bjarga heiminum“ og að grípa verði til kynlífsbanns gegn „öllum körlum sem borða kjöt“. The Guardian skýrir frá þessu.

Fulltrúar Peta bentu á niðurstöðu rannsóknar frá Plos One frá því á síðasta ári þar sem kemur fram að karlar mengi 41% meira en konur af því að þeir borða meira kjöt. Segja talsmenn Peta að svona „eitruð karlmennska“ kalli á skírlífi og jafnvel bann við barneignum. Hvert barn sem fæðist ekki spari 58,6 tonn af CO2 á ári.

„Við þekkjum þá öll, úthverfapabbana með bjórflöskur og grilltengur að sýsla með 70 centa pylsur á 700 evru grillinu sínu,“ sagði Daniel Cox, hjá Peta, og sakaði feður um að sýna manndóm sinn með því að borða kjöt. Hann hvatti síðan þýska karla til að gerast grænmetisætur til að börnin þeirra hafi plánetu sem sé þess virði að lifa á.

Til að bæta gráu ofan á svart fyrir kjötætur hvatti Peta til að sérstakur skattur verði lagður á karla til að draga úr losun gróðurhúsalofttegunda.