Bandaríski leikarinn og grínistinn Bob Saget er látinn 65 ára að aldri. Hann fannst látinn á Ritz-Carlton hótelinu í Orlando í Flórída síðdegis í gær að staðartíma. Hann tróð upp í Jacksonville á laugardaginn en hann hafði verið á ferðalagi um Bandaríkin með uppistand.

Lögreglan í Orange County staðfesti á Twitter að Saget hefði fundist látinn síðdegis í gær. Ekkert bendi til að um afbrot hafi verið að ræða eða að fíkniefni hafi komið við sögu.

Margir muna eflaust eftir rödd Saget úr þáttaröðinni „How I Met Your Mother“ en hann var sögumaðurinn í þáttunum. Hann stýrði einnig „America‘s Funniest Home Videos“ hér áður fyrr.

Hann lætur eftir sig eiginkonuna Kelly Rizzo og á þrjár dætur frá fyrra hjónabandi.