Það er kannski ekki líklegt að heimilislæknar ráðleggi fólki að stunda meira kynlíf til að bæta heilsuna en miðað við niðurstöður nýrrar rannsóknar þá getur kynlíf verið jafn mikilvægt og að gæta að mataræðinu og áfengisneyslu og að hætta reykingum til að bæta heilsuna.

Kaye Wellings, prófessor í kynlífsheilbrigði við London School of Hygiene and Tropical Medicine, segir að rannsóknir bendi til að kynlíf geti haft jákvæð áhrif á heilsufar fólks, til dæmis ónæmiskerfið, hjartað, æðakerfið og þunglyndi.

Daily Mail skýrir frá þessu. Fram kemur að á síðasta ári hafi rannsókn, sem var birt í ritinu Fertility and Sterility, sýnt að það að stunda kynlíf að minnsta kosti þrisvar í mánuði drægi úr líkunum á alvarlegum veikindum af völdum COVID-19. Kenningin gengur út á að kynlífið geri líkamann betur í stakk búinn til að berjast við sjúkdóma.

Rannsókn frá 2004, sem var birt í Psychological Reports, sýndi að það að stunda kynlíf einu sinni til tvisvar í viku jók magn ónæmisglóbúlíns A sem er hluti af viðbragðskerfi ónæmiskerfisins sem verndar okkur gegn sýkingum.

Niðurstöður annarrar rannsóknar, sem var birt í vísindaritinu Ear, Nose & Throat, á síðasta ári sýna að fullnæging losi jafnvel um stíflur í nösum og nefúði.

Rannsókn vísindamanna við University College London sýndi að konur sem voru virkar í kynlífi, stunduðu kynlíf minnst einu sinni í mánuði, fengu tíðahvörf síðar en konur sem ekki stunduðu kynlíf.