Nýlega bauð danska vegagerðin út snjómokstur næsta vetur. Boðin voru há og niðurstaða sérfræðinga vegagerðarinnar var að þetta yrði alltof kostnaðarsamt. En þá fékk einhver þá snjöllu hugmynd að stytta veturinn bara um einn mánuð til að þetta yrði viðráðanlegt kostnaðarlega séð.

Þessi ákvörðun var tekin eftir að farið hafði verið yfir veðurgögn nokkur ár aftur í tímann.

Nú verða snjómoksturstæki því klár til að ryðja vegi og salta frá 15. október til 30. mars.  Áður voru þau til reiðu frá 1. október til 15. apríl. Með þessu hefur vegagerðin stytt veturinn úr sex og hálfum mánuði niður í fimm og hálfan.

Jótlandspósturinn hefur eftir Michael Kirkfeldt, rekstrarstjóra hjá vegagerðinni, að þetta sé gert eftir yfirferð á eldri veðurgögnum.  Hann sagði að veðurgögn frá 2015 fram til 2021/2022 hafi verið skoðuð og farið yfir hversu oft þurfti að senda moksturstæki og saltbíla út á vegina. Út frá því hafi verið ákveðið að stytta þann tíma sem saltbílar eru til reiðu um tvær vikur. Hvað varðar snjómokstur er tíminn styttur um fjórar vikur.

Þegar þessi ákvörðun var tekin átti það einnig sinn þátt að kostnaðurinn við snjómokstur og söltun þrefaldaðist í nýlegu útboði frá síðasta útboði. Ástæðan er stríðið í Úkraínu, eldsneytisverð og skortur á bílstjórum.

Hjá loftslagsrannsóknarmiðstöð dönsku veðurstofunnar sagði Adrian Lema að vegagerðin hafi nokkuð til síns mál um þróun veðurfars í Danmörku. Almennt séð fækki dögum sem frýs og frá 1873 hafi dögum þar sem frýs fækkað um 30 á ári samhliða 1,5 gráðu hækkun meðalhita.

Lenna sagði að reiknað sé með að hækkun meðalhita verði orðin 2,7 gráður fyrir aldamót. Það þýði að frostdögum muni fækka enn frekar. Nú séu þeir um 70 á ári en verði komnir niður í 50 um aldamótin ef miðað er við loftslagslíkön.