Lokaskýrsla nefndarinnar verður ekki lögð fram fyrr en á næsta ári en nú þegar hefur hún komið með nokkrar ráðleggingar til ríkisstjórnarinnar um hvernig sé hægt að bæta líf stúlkna úr minnihlutahópum. Danska ríkisútvarpið skýrir frá þessu.
Fram kemur að ein af þessum tillögum sé að banna stúlkum að bera slæðu yfir höfði sínu í grunnskólum landsins. Rökin fyrir þessu eru að þetta skipti stúlkunum í hópa og sýni að múslímsku stúlkurnar séu öðruvísi en stúlkur af dönskum uppruna.
„Við beinum sjónum okkar að því að tryggja að stúlkurnar, sem njóta ekki sama frelsis og við hin, fái það. Eitt af því sem kemur mikið við sögu er spurningin um slæðurnar og stúlkur sem þurfa að bera þær frá unga aldri,“ sagði Christina Krzyrosiak Hansen, formaður nefndarinnar og bæjarstjóri í Holbæk. „Ef maður er í vafa um hvort þetta sé vandamál eða ekki, þá finnst mér að maður eigi að fara í danskan skóla og tala við sumar af stúlkunum sem þetta snýst um,“ bætti hún við í samtali við Danska ríkisútvarpið.
Nefndin leggur til að bannið eigi að gilda um alla skóla á grunnskólastigi, þar á meðal múslímska einkaskóla.
Svipað bann var sett á í Frakklandi 2004. Þar mega hvorki nemendur né kennarar bera trúarleg tákn í skólanum. Brian Arly Jacobsen, lektor í trúarbragðafélagsfræði við Kaupmannahafnarháskóla, sagði að engar skýrar sannanir hafi komið fram um að bann af þessu tagi dragi úr félagslegri stjórnun yfir múslímskum stúlkum.
