Flestir þeirra sem smituðust af Ómíkronafbrigði kórónuveirunnar vissu ekki að þeir voru smitaðir. Þetta eru niðurstöður nýrrar rannsóknar vísindamanna við Cedars-Sinai Medical Centre í Bandaríkjunum.

Sky News skýrir frá þessu. Fram kemur að það að fólk hafi ekki vitað að það var smitað hafi líklega átt hlut að máli hvað varðar hraða útbreiðslu Ómíkron. Það að fólk veit ekki að það er smitað er auðvitað stór hindrun þegar kemur að því að takast á við faraldur af þessu tagi.

Dr Susan Cheng, einn höfunda rannsóknarinnar, sagði að rúmlega annar hver, sem smitaðist af Ómíkron, hafi ekki vitað af smitinu.

Rannsóknin hefur verið birt í JAMA Network Open.

Í fyrri rannsóknum var áætlað að 25%, hið minnsta, og hugsanlega allt að 80% þeirra sem smitast af kórónuveirunni finni ekki til neinna sjúkdómseinkenna.

Vísindamenn við Cedars-Sinai hafa rannsakað áhrif COVID-19 og bólusetninga í rúmlega tvö ár. Í upphafi söfnuðu þeir blóðsýnum úr heilbrigðisstarfsfólki og síðasta haust byrjuðu þeir að safna blóðsýnum úr sjúklingum.

Í heildina voru tekin 2.479 blóðsýni í upphafi Ómíkronbylgjunnar. Af þeim reyndust 210 vera sýkt með Ómíkron. Aðeins 44% þessara 210 einstaklinga vissu að þeir voru smitaðir og aðeins 10% höfðu fundið fyrir einhverjum sjúkdómseinkennum og töldu það vera kvef eða aðrar sýkingar.