Yfirvöld í Íran sögðu að Salman Rushdie og stuðningsmönnum hans ber að kenna um stunguárásina sem særði rithöfundinn alvarlega í síðustu viku. „Við teljum að engum nema Rushdie og stuðningsmönnum hans sé hægt að kenna um eða fordæma fyrir árásina,“ sagði fulltrúi utanríkisráðuneytis Írans, Nasser Kanani. Hann talaði við blaðamenn í morgun.
Kanani bætti við að Rushdie hafi ýtt undir reiði og vanþóknun almennings með því að móðga heilög íslömsk gildi og særa blygðunarkennd eins og hálfs milljarðs múslima. „Enginn hefur rétt á því að kenna íslamska lýðveldinu Íran um eitt né neitt,“ sagði Kanani og þvertók fyrir það að yfirvöld í Teheran hafi haft tengingu við hinn 24 ára gamla árásarmann Hadi Matar.
Fulltrúinn sakaði einnig Vesturlönd, og þá sérstaklega Bandaríkin, um tvöfalt siðgæði í stuðningi þeirra á tjáningarfrelsi og sagði að árás Rushdie á íslömsk gildi sé ekki hægt að styðja með trúarlegum, siðferðis-, mennskum eða lagalegum sjónarmiðum.
Hinn 75 ára Rushdie varð fyrir árásinni þegar hann undirbjó sig fyrir að flytja fyrirlestur. Umboðsmaðurinn hans Andrew Wylie sagði að rithöfundurinn hafi hlotið alvarlega áverka en jafnframt að hann sé ekki lengur í öndunarvél og geti talað.
