Um klukkan 6.30 á föstudaginn var lögreglunni í Iowa tilkynnt um skothríð á tjaldsvæðinu Maquoketa Caves State Park. Þegar lögreglumenn komu á vettvang fundu þeir þrjár manneskjur, sem höfðu verið skotnar til bana, í tjaldi.

Þetta voru Tyler Schmidt, 42 ára, Sarah Schmidt, 42 ára eiginkona hans, og dóttir þeirra, Lula Schmidt sem var 6 ára. Þau voru frá Cedar Falls í Iowa.

Lögreglan veit ekki enn með vissu af hverju þau voru myrt en telur að tilviljun hafi ráðið því að þau urðu fórnarlömb morðingjans. Talið er að 23 ára karlmaður frá Nevada hafi myrt þau en hann fannst látinn í skóglendi ekki langt frá tjaldi fjölskyldunnar. Talið er að hann hafi svipt sig lífi.

Rob Green, bæjarstjóri í Cedar Falls, skrifaði á Facebook að níu ára sonur hjónanna hefði lifað árásina af. „Níu ára sonur þeirra, Arlo, lifði árásina af og er nú á öruggum stað,“ skrifaði Green að sögn De Moines Register.