Úkraínumenn hyggjast safna saman gríðarlegu herliði, allt að 1 milljón hermanna, til þess að sækja til suðurs og ná aftur landssvæðum sem Rússar hafa hernumið. Þetta kemur fram í umfjöllun Sky-fréttastofunnar en í henni kemur fram að hið ógnarstóra herlið verði búið vopnum frá vestrænum bandamönnum Úkraínumann.

Haft er eftir Oleksii Reznikov, varnarmálaráðherra Úkraínu, að Volodymyr Zelensky, Úkraínuforseta, sé mikið í mun að ná landssvæðunum til baka. „Við áttum okkur á því að pólitískt séð þá er þetta mjög mikilvægt fyrir landið okkar. Forsetinn hefur fyrirskipað að yfirmenn hersins setjist við teikniborðið og geri áætlanir,“ segir Reznikov.

Hann gagnrýndi þó að vopn væru að berast hægar frá Vesturlöndum en vonast hefði verið til en sagði Breta þó standa upp úr varðandi stuðning til Úkraínumanna og minntist þá sérstaklega á breska varnarmálaráðherrann Ben Wallace.

Á sama tíma berast þau tíðindi að Rússar ásælist nærsveitir úkraínsku stórborgarinnar Kharkiv í samnefndu héraði, og ætla að gera það að sínu.

„Þetta er búið að vera langt ferli, einn og hálfur mánuður, en við höfum náð árangri. Úkraína var að berjast með 30 ára gömlum sovétvopnum. Við breyttum því á þremur mánuðum. Hinsvegar þurfum við fleiri vopn, og það hratt, til að bjarga lífum hermanna okkar,“ sagði Reznikov ennfremur.

Þá fjallar Sky einnig um að nýlegar upplýsingar bendi til þess að fjölmargir hermenn í liði Rússa séu orðnir uppgefnir enda margir hverjir verið í víglínunni frá því að innrásin hófst. Skortur sé á skipulögðum leyfum til þess að hvíla hermenn sem séu „andlega og líkamlega búnir á því.“