Amazon er með svo háa starfsmannaveltu að fyrirtækið hefur áhyggjur af því að það verði ekki fleira fólk að ráða í Bandaríkjunum árið 2024. Starfsmenn flutninga- og tæknirisans vonast til þess að þetta ástand neyði fyrirtækið til að greiða hærri laun en aðrir hafa áhyggjur af því að þetta muni leiða til meiri vélmennavæðingar og að það muni fækka störfum.
Áhyggjur stjórnenda komu fram í minnisblaði frá miðju ársins 2021 sem var lekið og komst til handa Recode. „Ef við höldum áfram eins og við erum að gera, mun Amazon tæma starfsmannalaug Bandaríkjanna fyrir árið 2024,“ stendur í minnisblaðinu samkvæmt þeim.
Guardian greindi einnig frá því að þessi næststærsti atvinnuveitandi Bandaríkjanna tapar um þremur prósentum starfsmanna sinna á hverri viku, sem er um 150% á ári. Það er tvöföld meðalstarfsmannavelta bandarískra flutnings- og geymslufyrirtækja.
Fyrrum stjórnandi Amazon í Phoenix í Arizona sagði Recode að Amazon gæti ekki framfylgt öryggisráðstöfunum því veltan sé svo há. Hann sagði að það væri „nánast ómögulegt að láta reka sig.“ Fjölmiðlafulltrúi tæknirisans sagði Guardian hins vegar að minnisblaðið væri bara vangaveltur og að fyrirtækið skoði „allar mögulegar aðstæður.“
Enn eru miklar áhyggjur af starfsmannaöryggi og heilsu hjá Amazon sérstaklega í ljósi þess að nánast allir starfsmenn þessa eins stærsta fyrirtækis heims séu utan stéttafélaga eins og flestir verkamenn Bandaríkjanna. Framkvæmdastjóri Amazon, Jeff Bezos, sagði hins vegar að Amazon „ætli að verða besti atvinnuveitandi jarðar og heimsins öruggasti vinnustaður,“ í bréfi til hluthafa á síðasta ári.
