Miklar hitabylgjur á Indlandi og í Pakistan síðustu vikur eru aðvörun um það sem bíður í framtíðinni. Þetta kemur fram í nýrri skýrslu World Weather Attribution en það eru samtök loftslagsvísindamanna.

Í skýrslunni kemur fram að loftslagsbreytingarnar hafi aukið líkurnar á langvarandi og eyðileggjandi hitabylgjum á Indlandi og í Pakistan í framtíðinni.

Vísindamennirnir vísa til þess að í hitabylgju í sunnanverðri Asíu í mars hafi hitinn á Indlandi farið í allt að 50 gráður en aldrei hefur mælst hærri hiti þar síðan mælingar hófust fyrir 122 árum.

Mars var einnig mjög þurr því úrkomumagnið var 62% minna en í meðalári í Pakistan og 71% á Indlandi.

Hitabylgjur eru ekki óvanalegar á þessu svæði áður en monsúntímabilið hefst en svona mikill hiti og lítil úrkoma hefur mikil og slæm áhrif á heilbrigði fólks og landbúnaðinn.

Arpita Mondal, loftslagssérfræðingur hjá Indian Institute of Technology í Mumbai, sagði í samtali við AP af ef meðalhitinn í heiminum verði tveimur gráðum hærri en fyrir iðnvæðinguna geti hitabylgjur af þessu tagi orðið fimmta hvert ár.  „Það sem við sjáum hér er fyrirboði um það sem koma skal,“ sagði hún.

Breska veðurstofan segir að vegna loftslagsbreytinganna sé 100 sinnum líklegra sé að hitabylgjur af þessu tagi verði  og að líklega muni þær verða á þriggja ára fresti.