Nú stendur yfir fjársöfnun fyrir börn Irma Garcia sem var myrt í skotárás í grunnskóla í Uvalde í Texas í síðustu viku. Hún var kennari í skólanum. Í árásinni voru 19 börn skotin til bana og tveir fullorðnir.

Skömmu eftir ódæðisverkið lést Joe Garcia, eiginmaður Irma, af völdum hjartaáfalls en talið er að sorg hafi valdið því að hann fékk hjartaáfall og hafi sorgin því í raun orðið honum að bana.

Nú hefur vel á þriðju milljón dollara safnast handa börnum þeirra hjóna en þau láta eftir sig fjögur börn.

CNN segir að Debra Austin, frænka Irma, hafi hrundið söfnuninni af stað á GoFundMe. Þar skrifaði hún: „Irma var eiginkona, fjögurra barna móðir, systir, dóttir, frænka og dásamleg manneskja. Hún gerði bókstaflega allt fyrir alla. Hún elskaði skólabörnin og dó þegar hún reyndi að vernda þau.“

Markmiðið með söfnuninni var að safna 10.000 dollurum sem börnin áttu að fá til að mæta ýmsum kostnaði.

Þegar þetta var skrifað höfðu um 49.000 framlög borist og var heildarupphæðin komin í rúmlega 2,7 milljónir dollara.

Irma starfaði við kennslu í 23 ár. Hún og Joe höfðu verið par síðan á menntaskólaárunum. Þau láta eftir sig fjögur börn: Cristian, Jose, Lyliana og Alysandra.