Í tengslum við heimsfaraldur kórónuveirunnar hafa flestir orðið meðvitaðri en áður um hreinlæti og mikilvægi þess að halda fingrunum frá andlitinu. Sumir muni kannski halda í þessar venjur þegar heimsfaraldurinn verður afstaðinn og það er kannski ekki slæm hugmynd.
Eftir því sem dregið hefur úr faraldrinum hefur lífið komist meira í sama horf og áður og sífellt fleiri ferðast flugleiðis. Í tengslum við þetta deildi Linda Ferguson, sem hefur starfað sem flugliði í 24 ár, af reynslu sinni og vitneskju um hvað á að forðast að gera um borð í flugvélum. Þetta gerði hún á samfélagsmiðlinum Reddit.
Hún segir að flugvélar séu nánast eins og ein stór baktería, svo mikið sé af þeim í vélunum. Hún segir að ef fólk sæi hversu margar bakteríurnar eru myndi því ofbjóða.
Hún og fleiri flugliðar segja á Reddit að það séu ýmsir staðir í flugvélum sem farþegar ættu sjálfir að þurrka af áður en þeir nota þá, svo skítugir séu þeir. Fyrir það fyrsta á að forðast að halla höfðinu upp að glugga eða vegg en margir gera það í flugferðum. Þau mæla einnig með að fólk þurrki af borðinu fyrir framan það.
Linda segist vera farin að sjá marga koma með klúta með um borð til að þrífa í kringum sæti sín.
