Tap írska lággjaldaflugfélagsins Ryanair á síðasta rekstrarári, sem lauk 31. mars 2022, var sem nemur um 48 milljörðum íslenskra króna. Veltan á tímabilinu var sem svarar til um 677 milljarða íslenskra króna en það er næstum þrefalt meira en árið á undan.

Ástæðan fyrir aukinni veltu er auðvitað að byrjað var að slaka á hömlum vegna heimsfaraldurs kórónuveirunnar og því fóru fleiri að ferðast.

Farþegafjöldinn þrefaldaðist á milli ára en félagið flutti 91,1 milljón farþega á síðasta ári.

En útgjöldin jukust mikið og rúmlega tvöfölduðust á milli ára. Aðalástæðan er hærra eldsneytisverð.

Í tilkynningu frá Ryanair kemur fram að rekstrartapið hafi verið um þriðjungur þess sem það var árið á undan. Félagið reiknar með að byrja að skila hagnaði fljótlega.