Á grunni 17 ára athuguna á plánetunni kom í ljós að hitinn á henni lækkaði stöðugt á milli 2003 og 2018 eða um átta gráður. En í lok þessa tímabils hækkaði hitinn á suðurpólnum um ellefu gráður á skömmum tíma. Sky News skýrir frá þessu.
Fram kemur að gufuhvolf Neptúnusar geri að verkum að plánetan sé að mörgu leyti torskilin. Hún er mjög ólík nágranna sínum, Úranusi, þar sem eru til dæmis engin skýr veðurmynstur. Vísindamenn tóku hins vegar eftir því fyrir nokkrum árum að dularfullur dökkur stormur á Neptúnusi breytti skyndilega um stefnu og fór í gagnstæða átt við þá sem hann hafði áður farið í. Þetta er eitthvað sem vísindamenn höfðu aldrei áður séð.
Hvað varðar hitabreytingarnar þá sagði Dr. Michael Roman, nýdoktor við University of Leicester, að hitabreytingarnar hafi komið mjög á mjög á óvart. Verið sé að fylgjast með Neptúnusi á fyrstu stigum sumars á suðurhvelinu og því hafi verið reiknað með að hitinn myndi hækka en ekki lækka.
Gögnin sem unnið var úr ná yfir tæplega hálfa árstíð og því áttu vísindamennirnir ekki von á að sjá miklar og hraðar breytingar. Ekki er vitað hvað veldur þessum hitabreytingum.
Rannsóknin hefur verið birt í vísindaritinu the Planetary Science Journal.
