Það er ekki snjallt að ljúga til um reynslu sína og menntun á ferilskránni. Það er kannski sérstaklega alvarlegt þegar flugmenn eiga í hlut því mikil ábyrgð hvílir á herðum þeirra og því ótrúlega óábyrgt að ljúga til um reynslu eða menntun sem flugmaður.

En það stöðvaði ekki Craig Butfoy, sem hefur starfað hjá British Airways, í að ljúga til um starfsreynslu sína þegar hann sótti um vinnu hjá flugfélaginu.

Ladbible segir að hann hafi nú verið dæmdur í tólf mánaða fangelsi fyrir brot á loftferðalögum og svik. Hann játaði brot sín. Hann var meðal annars sakfelldur fyrir að hafa skrifað á ferilskrá sína að hann væri með 1.610 klukkustunda reynslu sem flugstjóri í áætlunarflugi vitandi að svo væri ekki.

Hann skrifaði líka að hann væri með leyfi til að fljúga einkaflugvélum en það er ekki rétt. Hann skreytti sig einnig fleiri stolnum fjöðrum.

British Airways, sem hann starfaði hjá árum saman, segir að hann hafi aldrei stefnt farþegum í hættu. Ástæðan sé meðal annars að hann hafi verið með flugmannsréttindi og að alltaf séu tveir flugmenn í vélum félagsins.