Þetta segja blaðamennirnir Jonathan Martin og Alexander Burns. CNN segir að samkvæmt því sem kemur fram í bókinni hafi Biden sagt við ónafngreindan mann á miðju síðasta ári að Murdock „væri hættulegasti maður heims“.
Bókin heitir „This Will Not Pass: Trump, Biden, and the Battle for America‘s Future“. Hún kemur út í maí. Í henni er Fox lýst sem straumi þátta sem beinast gegn Biden, kyndi undir efasemdum um bóluefni og breiði út villtar samsæriskenningar um árásina á bandaríska þinghúsið í janúar 2021.
Margir stuðningsmenn Biden hafa afneitað Fox af þessum sökum og kenna Rupert Murdoch og syni hans, Lachlan, sem er stjórnarformaður Fox um að leyfa þáttastjórnendum eins og Tucker Carlson að starfa.
Biden hefur hins vegar aldrei tjáð sig opinberlega um Murdoch og því má reikna með að þau ummæli sem eru eignuð honum í bókinni muni vekja mikla athygli.
