„Við erum að nálgast hættulegasta tímapunkt mannkynssögunnar,“ segir bandaríski rithöfundurinn og samfélagsrýnirinn Noam Chomsky í viðtali við The New Statesman. „Við stöndum frammi fyrir möguleikanum á algjörri útrýmingu mannkyns hér á jörðu.“

Ástæðuna fyrir þessari svartsýni Chomsky má meðal annars rekja til aukinnar hættu á notkun kjarnavopna vegna stríðsins í Úkraínu. „Við gætum verið að fara í kjarnorkustríð ef við náum ekki að nýta möguleikana sem standa til boða fyrir samningaviðræður,“ segir hann.

Einnig hefur Chomsky miklar áhyggjur af loftlagsbreytingum. „Við erum að nálgast óafturkræf tímamót og við getum ekki komið í veg fyrir það mikið lengur. Það þýðir ekki að allir séu að fara að deyja en það þýðir að við erum að fara inn í framtíð þar sem þeir heppnu verða þeir sem deyja fljótt.“

Í viðtalinu talar Chomsky einnig um Donald Trump, fyrrum Bandaríkjaforseta, en hann stefnir á að verða forseti að nýju. Chomsky hefur áhyggjur af því og ber ræður Trump saman við ræður sem hann heyrði í útvarpinu þegar hann var ungur að aldri.

„Ég man eftir því að hafa hlustað á ræður Hitlers í útvarpinu. Ég skildi ekki orðin, ég var sex ára gamall. En ég skildi hvað var í gangi og það var ógnvekjandi. Ég get ekki gert annað en að hugsa um það þegar ég horfi á samkomurnar sem Trump heldur núna.“