Ástralska flugfélagið Qantas bætir fljótlega nýrri flugleið við áætlun sína en hún er á milli Melbourne í Ástralíu og Dallas í Bandaríkjunum. Flug á leiðinni hefst í byrjun desember og verða Boeing 787 Dreamliner vélar notaðar í það. Flugið tekur um 17 klukkustundir.

Í Dallas geta farþegar síðan tekið tengiflug með American Airlines, sem er samstarfsaðili Qantas, til fjölda áfangastaða.

Qantast er nú þegar með beint flug til nokkurra áfangastaða í Bandaríkjunum en þetta er í fyrsta sinn sem boðið verður upp á beint flug á milli Melbourne og Dallas. CNN skýrir frá þessu.

Þetta verður ein lengsta beina flugleið heims en sú lengsta er á milli Singapore og New York á vegum Singapore Airlines en það flug tekur 18 klukkustundir.  Frá Nýja-Sjálandi er hægt að fljúga beint frá Auckland til New York en það tekur 17 klukkustundir og 35 mínútur.