Lögreglan á Norður-Jótlandi í Danmörku hefur handtekið tvo 36 ára gamla karlmenn í tengslum við hvarf Mia Skadhaug Stevn. Mia hvarf snemma á sunnudagsmorguninn þegar hún var á leið heim frá miðborg Álaborgar. Síðan hefur ekkert spurst til þessarar 22 ára konu.

Í tilkynningu frá lögreglunni segir að mennirnir séu grunaðir um morð. Lögreglan vinnur nú að vettvangsrannsóknum á tveimur stöðum. Þeir eru í bænum Østervrå og bænum Flauenskjold. Mun vinna lögreglunnar á þessum stöðu standa yfir í langan tíma að hennar sögn.

Í tilkynningu lögreglunnar kemur fram að verið sé að yfirheyra mennina þessa stundina.

Eins og DV skýrði frá í gær þá hurfu Mia og Oliver Ibæk Lund á tveimur sólarhringum í Álaborg. Enn hefur ekkert spurst til Oliver en umfangsmikil leit stendur yfir að honum í dag.

Lögreglan hafði lýst eftir svörtum bíl, sem Mia sást fara inn í á Vesterbro, klukkan 06.09 á sunnudagsmorguninn. Óskaði hún eftir upplýsingum um bílinn. Í morgun sendi lögreglan tilkynningu frá sér þar sem fram kom að hún hefði fengið fjölda ábendinga um bílinn og þyrfti ekki fleiri.

Ekki hefur verið skýrt frá því hvort lík Mia sé fundið.

Tvö dularfull mannshvörf í Álaborg á tveimur sólarhringum – Lögreglan leitar að ákveðnum bíl