Saab bifreiðar voru framleiddar í miklu magni og nutu mikilla vinsælda. Það hefur þó farið minna fyrir þeim síðustu árin en áður. En Saab 96 frá 1979 er greinilega eftirsóttur því fyrr í mánuðinum seldist einn slíkur fyrir 500.00 sænskar krónur, sem svarar til 6,9 milljóna íslenskra króna, á uppboði í heimalandinu.

Bíllinn er merkilegur fyrir þær sakir að á þeim 42 árum sem eru liðin síðan hann var seldur í fyrsta sinn þá er aðeins búið að aka honum 7 kílómetra!

„Út frá þeim upplýsingum, sem okkur tókst að afla okkur, þá fékk eigandinn bílinn fluttan með vörubíl heim til sín. Því næst var honum ekið inn í hlöðu, geymdur og gleymdur. Eigandinn var mikið á ferðinni og seldi á mörkuðum og átti marga bíla,“ sagði Frank Gausland hjá netauktion.se að sögn Dagbladet.

Bíllinn virðist hafa staðið inni í hlöðunni í 42 ár. Hann var settur á uppboð þegar eigandi hans lést.

Hann er aðeins ryðgaður en með þvotti og góðu bónlagi var hresst vel upp á útlitið. Það virðist hafa gefið góða raun miðað  við söluverðið.