Ef þú sérð meðvitundarlausan mann liggja á götunni hjálpar þú honum eða heldur þú för þinni áfram? Það er spurningin sem margir Frakkar spyrja sig þessa dagana. Ástæðan er að nýlega lést svissneski ljósmyndarinn René Robert, 85 ára, eftir að hann datt niður á Rue de Turbigo í París. Þetta er fjölfarinn staður en samt sem áður hjálpaði enginn honum í níu klukkustundir. Hann króknaði.

The Guardian segir að René Robert hafi verið einna þekktastur fyrir að mynda marga af þekktustu flamingódönsurum Spánar.

Það var vinur hans, Michel Mompontet, sem hratt umræðunni af stað nýlega á Twitter. Hann skýrði þá frá því að Robert hafi dottið á Rue de Turbigo. Hann hafi líklega svimað og dottið. „Hann gat ekki staðið upp, lá á götunni í níu klukkustundir þar til heimilislaus maður hringdi eftir aðstoð. Ekki ein einasta manneskja hjálpaði honum á þessum níu klukkustundum. Ekki ein,“ skrifaði hann.

Í samtali við franska sjónvarpsstöð sagði Mompontet að Robert hafi „verið drepinn af skeytingarleysi.“

Samtök heimilislausra segja að árlega látist um 600 heimilislausir á götum Frakklands.

Fyrir nokkrum árum vakti myndband á YouTube-rásinni NorniTube mikla athygli en í því var rannsakað hvort vegfarendur væru líklegri til að hjálpa manni, sem datt niður á götu úti, ef hann var í jakkafötum í stað þess að líta út fyrir að vera heimilislaus. Niðurstaðan var skýr. Þegar hann var klæddur eins og heimilislaus lá hann miklu lengur á götunni og hrópaði á hjálp. Ef hann var í jakkafötum fékk hann nær samstundis hjálp.