Að undanförnu hafa norðurkóreskir lögreglumenn gengið hús úr húsi i höfuðborginni Pyongyang og safnað rithandarsýnum fólks. Þetta er gert til að hægt verði að handtaka veggjakrotara sem skrifaði á vegg í borginni. Textinn er mjög ögrandi og má krotarinn alveg eins búast við að verða tekinn af lífi ef hann næst.

Hann skrifaði: „Kim Jong-un, heimski kúkurinn þinn. Það er þér að kenna að fólk sveltur til bana.“

Þetta þykir mjög gróf móðgun við einræðisherrann sem er ekki vanur að fara mjúkum höndum um andstæðinga sína. Það gerir málið enn sérstakara að í höfuðborginni búa betur efnaðir landsmenn og elítan.

Daily NK skýrir frá þessu en miðillinn er staðsettur í Suður-Kóreu en er með heimildarmenn í Norður-Kóreu. Fram kemur að veggjakrotið hafi verið fjarlægt fljótlega eftir að það uppgötvaðist á vegg í einu af dýrari hverfum borgarinnar. Næsta dag komu lögreglumenn í verksmiðjur og byggingasvæði í nágrenninu til að fá rithandarsýnishorn hjá fólki.

The Telegraph hefur eftir Toshimitsu Shiegmura, japönskum prófessor og sérfræðingi í málum norðurkóresku Kim-ættarinnar sem stýrir landinu með harðri hendi, að það sé mikið áfall fyrir yfirvöld og almenning að veggjakrot á borð við þetta hafi verið gert í höfuðborginni.

Vegna heimsfaraldursins er Norður-Kórea nú að heita má algjörlega lokað land fyrir umheiminum og voru samskiptin nú ekki mikil áður. Þessi einangrun hefur haft áhrif á fæðuöflun þjóðarinnar og telja Sameinuðu þjóðirnar að 860.000 tonn af mat vanti upp á matvælaframleiðslu landsins á árinu en það svarar til matar í 2,3 mánuði fyrir þjóðina.

Shigemura segir að matarskorturinn sé í vaxandi mæli farinn að hafa áhrif á hina efnameiri.