Independent skýrir frá þessu. Fram kemur að kallað hafi verið á sjúkrabíl en Anna hafi verið látin í hótelherberginu þegar að var komið. Allt frá upphafi beindust sjónir lögreglunnar að Schätzle en hann er þýskur og hafði áður starfað sem dyravörður.
Í framhaldi af andlátinu kom fram að Schätzle var skuldum vafinn vegna mikillar áfengis- og fíkniefnaneyslu og kaupa á dýrum fatnaði. Hann skuldaði sem nemur rúmlega sjö milljónum íslenskra króna. Þegar Anna lést átti hún sem svarar til um 4,5 milljóna á bankareikningi sínum. Þetta vissi Schätzle að sögn saksóknara.
Nokkrum mánuðum eftir andlátið fannst kreditkort Önnu, sem hafði verið týnt, bak við þil á hótelinu. Talið er að Schätzle hafi falið það þar til að hann gæti síðar sótt það og notað.
Hann er nú fyrir rétti í Lugano í Sviss, ákærður fyrir að hafa myrt Önnu. Vitni hafa borið að þau hafi heyrt öskur og hróp frá herbergi parsins. „Ég heyrði að glas var brotið og húsgögnum var ýtt til. Það var grátið. Rödd sagði: „You are killing me“ (þú ert að drepa mig) eða „you are kidding me“ (þú meinar það ekk). Ég vildi gjarnan fara í herbergið og segja eitthvað en taldi það of hættulegt,“ sagði einn hótelgesta fyrir dómi.
Schätzle hafnar því að hafa myrt Önnu og segir að hún hafi látist á hörmulegan hátt þegar kynlíf þeirra fór úr böndunum. Þau hafi verið í kynlífsleik þar sem kyrking kom við sögu. „Ég setti handklæði utan um háls hennar og byrjaði að kyssa hana. En hún vildi meira svo ég lagði hönd ofan á handklæðið og þrýsti,“ sagði hann.
Niðurstaða krufningar var að Anna hefði kafnað. Hún var einnig með áverka víða um líkamann.
Réttarhöldin standa enn yfir.
