Lögreglan á Nýja-Sjálandi skaut í dag mann til bana eftir að hann hafði stungið nokkra í verslunarmiðstöð í Auckland. Maðurinn var skotinn til bana tæpri mínútu eftir að árás hans hófst.

Samkvæmt fréttum nýsjálenskra fjölmiðla hljóp fólk út úr verslunarmiðstöðinni í mikilli örvæntingu eftir að maðurinn réðst á fólkið. Lögreglan var fljót á vettvang og var árásarmaðurinn skotinn til bana tæpri mínútu eftir að hann hóf árásina.

BBC segir að sex hafi verið stungnir og að þrír séu í lífshættu.

Jacinda Ardern, forsætisráðherra, sagði að um hryðjuverk hafi verið að ræða og að árásarmaðurinn, sem er frá Sri Lanka, hafi verið skotinn til bana tæpri mínútu eftir að hann lagði til atlögu við viðskiptavini verslunarmiðstöðvarinnar. Hún sagði manninn hafa verið undir áhrifum af hugmyndafræði Íslamska ríkisins. Hann kom til Nýja-Sjálands fyrir tíu árum og frá 2016 hefur hann verið á lista yfir einstaklinga sem eru taldir geta ógnað öryggi ríkisins.