Á síðasta ári afplánaði Shane Goldsby, 26 ára, dóm í Airway Heights Corrections Center austan við Seattle í Bandaríkjunum. Klefafélagi hans var hinn sjötugi Robert Munger sem var dæmdur í 43 ára fangelsi árið 2019 fyrir að hafa nauðgað barnungri systur Shane og fleiri börnum og fyrir vörslu barnakláms.

Svo undarlegt sem það nú er þá þótti fangelsisyfirvöldum ekkert athugavert við að setja þá saman í klefa þrátt fyrir að Robert hafi brotið hrottalega gegn systur Shane. Fox News skýrir frá þessu.

Í tilkynningu sem Shane Goldsby sendi fjölmiðlum kemur fram að Robert Munger hafi lýst afbrotum sínum fyrir honum í smáatriðum. Segir Shane að hann hafi fyllst „ofsareiði“ við þetta og hafi ráðist á Robert. Bandarískir fjölmiðlar segja að hann hafi fengið 14 högg í andlitið og 4 spörk. Þetta lifði hann ekki af og nú hefur Shane verið dæmdur í 24 ára fangelsi fyrir að hafa myrt hann. Fyrir hafði hann hlotið dóm fyrir stuld á lögreglubifreið og fyrir að hafa sært hermann.

Fyrir dómi harmaði Shane það sem hann gerði og sagðist ekki geta ímyndað sér hvernig það væri að missa elskaðan ástvin á þennan hátt. „Ég bið eiginkonu hans afsökunar sem og alla fjölskyldu hans og vonast til að þau jafni sig á því sem ég á sök á,“ segir í yfirlýsingu frá honum.

Shane hafði kvartað yfir að þurfa að deila klefa með Robert en fangelsisyfirvöld höfðu engar áhyggjur af því og hafa vísað því á bug að þau hafi vitað um tengsl mannanna.